Nosc frabicat
Storia
Le museum à süa sënta tl palaz aministratif dl imparadù Maximilian I., le “Maximilianisches Amtshaus“, tl ciantun nord-ost dl zënter storich dla cité de Balsan. Por le pröm iade vëgn le frabicat tert-gotich nominé dl 1500, ann te chël che l’imparadù comana che la sënta aministrativa ch’al â lascé fà sö gness completada y ch’al gness fat le tët. Ti agn do êl tl frabicat l’aministraziun dles entrades dal raiun dl Adesc. Col passè di secui à le frabicat albü funziuns desvalies, suradöt sciöche zënter aministratif.
Strotöres architetoniches originales s’él mantignì püces daìte tl frabicat. De na belëza particulara é le salf a ôc gotics tl’alzada a tera, olach’al vëgn por üsanza fat les mostres tematiches. Implü él gnü mantignì dui sössoc gotics de lëgn, valgügn ôc a spiz y dui blasuns depënc tai ôc a crusc de n balcun tort.
Le frabicat de proprieté dl stat é gnü surantut dl 1973 dla Provinzia Autonóma de Balsan, y al é plan plan madorì l’idea da mëte tl “Amtshaus“ le Museum de Sciënzes Naturales ch’an ea tl laûr da proieté. Dl 1989 é le proiet gnü aprovè, y insciö àl metü man i laûrs de restrotöraziun y adatamënt.
De merz dl 1997 é le museum por le pröm gnü daurì al publich cun n’esposiziun tematica. Dui agn y mez dedô é gnüs completês ince i laûrs de ressanamënt di salfs por la mostra permanënta che i é gnüs dauris al publich.
Shop
Tl’alzada a tera i pîta le Museum de Sciënzes Naturales a sü vijitadus na butëga cun la lîta de marcianzia desvalia: peres rares y minerai dal monn intier, materiai por coleziuns privates, t-shirts dl museum, posters, chertes postales, sambëgn les publicaziuns dl museum, leteratöra bun chirida fora che informëia sön i argomënc dles mostres tematiches y tröp d’ater.