I nautiloig dla formaziun belerofonn te Gherdëina
Sön döes costes marcantes söl Pice Balest y sön Secëda él gnü ejaminé na fauna de nautilus rica che ê gnüda descurida tla formaziun belerofonn (Perm alt). Ara se trata pro i plü de 100 ejemplars colezionês bonamënter dla maiù fauna de nautilus dla Tetida d’eté permica, caraterisada suradöt dala grandëza de sües sorts. Le proiet é gnü eseguì da Herwig Prinoth sot ala direziun dl prof. Renato Posenato (Université de Ferrara).
Bonamënter se tratera pro chisc nautiloig di maiús di predadus dl mer dl Perm dla Tetida. Tla coleziun éson stês bogn da ne n desfarenzié 8 sorts desvalies, döes de chëstes conesciôn bele dala leteratöra (Tirolonautilus crux y T. sebedinus, 6 sorts indere é gnüdes descrites por le pröm iade (Tainoceras balestense, Tainoceras malsineri, Peripetoceras comploji, Peripetoceras gigas, Liroceras gardenense, Foordiceras dolomiticum). Tl medem tëmp àn sciafié da elaborè y descrì coleziuns comparatives y ejemplars sternüs fora.
Dlungia i nautiloig él gnü al löm ince döes sorts de brachiopog (Comelicana) y n gran numer de sgnec belerofonn. Pro i brachiopog se tratera dles comelicanies plü vedles dl raiun dolomitich.
Leteratöra:
POSENATO R. & PRINOTH H. (2004) - Orizzonti a nautiloidi e a brachiopodi della Formazione a Bellerophon (Permiano Superiore) in Val Gardena (Dolomiti). Geo-Alp, vol. 1, pp. 71-85.PRINOTH H. (2000) - I Nautiloidi della Formazione a Bellerophon (Permiano superiore) della Val Gardena, Dolomiti (BZ). Unpublished thesis, 80 + 180 pp., Ferrara University.