Paleontologia dl Puez-Mergel (Crëda bassa)
Studié y inventarisé sistematicamënter la fauna fossila dl Puez-Mergel tl Pöz-Gherdenacia (danter Col la Pieres y Col dla Soned) ê l’obietif de chësc proiet. Ara se trata de na fauna dla Crëda bassa; la perioda éson stês bogn da determiné avisa sciöche Valangin bas – Barem, le tëmp aptian indere é gnü determiné mâ indiretamënter. Esecuturs dl proiet é stês Christian Aspmair, le prof. Karl Krainer (Université da Desproch) y Alexander Lukeneder (Naturhistorisches Museum Wien).
Les scovertes é metüdes adöm da na fauna de amonic dër rica y variada (zirca 30 sorts), cun elemënc tipics dl raiun mediteran, mo zënza influënzes boreales. Tröc amonic mostrâ la chersciüda de crinoides y serpulides.
N interès particular à descedè valgünes formes eteromorfes y na forma (Cantianiceras) che é gnüda descrita por le pröm iade dal’eté dla Crëda dles Dolomites. Cina sëgn êra conesciüda mâ dala Crëda dles Alpes lessiniches.
Adinfora dles peres desvalies d’amonit y di stamps de amonit él gnü coiü adöm ince aptics, valgügn belemnic, igli aberanc dl mer, bivalves (Properamusium) y na fauna de brachiopog che é metüda adöm suradöt da Triangope triangulus y Pygite diphyoides.
La fauna radiolara (Spumellaria) confermëia l’eté di amonic. Publicaziuns de chësc vers vëgn arjignades ca.